House နှင့် Home အသုံးပြုပုံ ကွဲပြားမှု ကို ဆရာကြီး ဦးသာနိုး၏ ရှင်းလင်းချက်

- မြန်မာစကားမှာ "အိမ်" ပဲ ရှိတဲ့အတွက် ကျောင်းသားတွေ အင်မတန်မှားတတ်တဲ့ စကားလုံးနှစ်လုံးဖြစ်တယ်။ သေသေချာချာ ခွဲခြားမှတ်သားဖို့ လိုပါလိမ့်မယ်။
- ပထမဆုံး မှတ်ရမှာက House ဆိုတာ လူနေတာရော၊ မနေတာရော၊ အဆောက်အုံမှန်သမျှ(any building) ကို ခေါ်တာဖြစ်တယ်။ Home ဆိုတာက ကိုယ်နေထိုင်ရာ ဖြစ်တယ်။
- အဲဒီတော့ ကိုယ်က အထိုက်အလျှောက်တတ်နိုင်လို့ မြေကွက်လေးတစ်ကွက်ဝယ် အဲဒီမှာ အဆောက်အုံလေးတစ်ခုဆောက်တယ် ဆိုပါတော့၊ အဲဒါ house ပေါ့။ အဲဒီမှာ ခင်ဗျား နေမယ်ဆိုရင်တော့ ဒါ ခင်ဗျားရဲ့ home ဖြစ်သွားတာပေါ့။ ဒီတော့ ခင်ဗျားရဲ့ Home က House တစ်ခုဖြစ်တယ်။ (Your home is a house.)
- ခင်ဗျားက လူမနေဘဲနဲ့ ကုန်ပစ္စည်းတွေပဲ လှောင်ဖို့ သုံးမယ်ဆိုရင်တော့လည်း သိုလှောင်ရုံဖြစ်သွားမယ်။ ဒါကို အင်္ဂလိပ်လို ware house လို့ ခေါ်တယ်။ အမေရိကန် အင်္ဂလိပ်စကားမှာတော့ store house လို့ ခေါ်တယ်။

- ရုပ်ရှင်ကြည့်ရင် ရုံပြည့်သွားတဲ့အခါ HOUSE FULL လို့ စာတန်းထောင်ထားတာ တွေ့ဖူးပါလိမ့်မယ်။ ရုပ်ရှင်ရုံကို house လို့ ခေါ်တာ သတိပြုမိမယ်။ ပြဇာတ်ရုံကိုလည်း house သုံးတာပါ။ အလားတူ အစိုးရရုံး၊ ကုမ္ပဏီရုံး၊ လွှတ်တော်တို့ကိုလည်း house သုံးတယ်။ အကောက်ခွန်ရုံးကို Customs House လို့ ခေါ်တယ်။ အထက်လွှတ်တော်ကို Upper House ၊ အောက်လွှတ်တော်ကို Lower House  လို့ ခေါ်တယ်။
- ကိုယ်နေတာ၊ တစ်ဦးတစ်ယောက် နေတာကို Home လို့ ခေါ်တယ်။ အထက်နားမှာ တင်ပြခဲ့သလို အထိုက်အလျေက် ကြွယ်ဝသူတစ်ဦးအဖို့တော့ သူ့ရဲ့ Home ဟာ House တစ်ခုဖြစ်တယ်။ သူ့လောက်မှာ မတတ်နိုင်သူတွေကတော့ မြို့ကြီးတွေမှာ တိုက်ခန်း (flat) ငှားပြီး နေရတာပေါ့။ အဲဒီလူအဖို့ သူ့ Home ဟာ flat တစ်ခုမျှသာဖြစ်တယ်။ (My home is a flat.)
-  တောရွာက လယ်သမားကြီး တစ်ဦးကတော့ တဲ (hut) နဲ့ နေရတာပါ့။ သူ့အဖို့ Hut ဟာ Home ပါပဲ။
- ပုပ္ပါးတောင် ခလယ်နားလောက်မှာ ဂူထဲနေတဲ့ ရသေ့ကြီး တစ်ပါးရှိတယ်။ အဲဒီရသေ့ကြီးက အင်္ဂလိပ်လိုလည်း တတ်တယ်။ သူက ဂူကို လက်ညှိုးထိုးပြပြီး This cave is my home လို့ ပြောပြပါလိမ့်မယ်။ သစ်ပင်ခွကြားမှာ တက်အိပ်တဲ့ တောတွင်းသား အဖို့တော့ သစ်ပင်ဟာ သူ့ Home ပေါ့။
- ဒီတော့ Home ဖြစ်နိုင်တာတွေဟာ house, flat, hut, cave, tree စသည်ဖြင့် အမျိုးမျိုး ရှိတယ်။
- နောက်ပြီး မိဘမဲ့ကလေးတွေ၊ လေလွင့်ကလေးတွေ၊ လမ်းမှားရောက်ခဲ့တဲ့ အမျိုးသမီးတွေ၊ သားထောက်နောက်ခံမရှိတဲ့ သက်ကြီး သက်အိုတွေ အတွက် အစိုးရကဖြစ်ဖြစ်၊ ကုသိုလ်ဖြစ် အဖွဲ့အစည်းတစ်ခုခုက ဖြစ်ဖြစ် ဆောက်လုပ်စီစဉ်ထားတဲ့ ကလေးတွေများဂေဟာ၊ ဘိုးဘွားရိပ်သာ၊ အမျိုးသမီးရိပ်သာတို့ကိုလည်း Home ပဲ ခေါ်တယ်။ Children's home, home for the aged, women's home စသည်ဖြင့်။
- နိုင်ငံခြားတိုင်းပြည်များနဲ့ ယှဉ်ပြောတဲ့အခါ ကိုယ့်တိုင်းပြည်ကိုလည်း Home လို့ ပြောရပါတယ်။ နိုင်ငံခြားရောက်နေသူတစ်ဦးက I'm going home လို့ ပြောတာဟာ ကိုယ့်တိုင်းပြည် ကိုယ်ပြန်မယ်လို့ ပြောတာပါ။ အလားတူ ပြည်ထဲရေးကို Home Affairs ၊ ပြည်တွင်းသတင်းကို Home News လို့ ခေါ်တယ်။
- အိမ်ကွက်ကွက်လေးတင် မဟုတ်ဘဲ ကိုယ့်ဝန်းကျင်၊ မြို့ရွာ၊ ခရိုင်ကိုလည်း Home လို့ ပြောနိုင်တယ်။ My home is the delta. ကျွန်တော် (ကျွမ်းတဲ့၊ ကျက်စားတဲ့) ဒေသက မြစ်ဝကျွန်းပေါ်လေ။
- တိရစ္ဆာန်၊ ငှက် စသည် ကျက်စားရာ အရပ်၊ စတင်တွေ့ရာ အရပ်ကိုလည်း Home ပဲ ခေါ်တယ်။ The elephant's home is in the Yoma. ဆင်ကိုတွေ့ရတဲ့ နေရာက ရိုးမပါပဲ။
- အယူအဆတစ်ခု၊ အခြင်းအရာတစ်ခု စတင်ရာ၊ ထွန်းကားကိုလည်း Home လို့ သုံးလေ့ရှိတယ်။ Japan is the home of martial arts. ဂျပန်ဟာ ကိုယ်ခံပညာထွန်းကားရာ ဖြစ်တယ်။
- နောက်တစ်ခု မှတ်သားစရာရှိတာက Home ဟာ Noun ဖြစ်သလို Adverb လည်း ဖြစ်တယ်။ ဒါကြောင့် to တို့ at တို့ ထည့်သုံးစရာ မလိုဘူး။ Let's go home. အိမ်ပြန်စို့။ He is home now. သူအခု အိမ်မှာရှိနေတယ်။ အိမ်ပြန်ရောက်နေပါပြီ။ ဒါပေမဲ့ He is at home လို့ ပြောလည်း ရသေးတယ်။ to ကိုတော့ လုံးဝ တွဲမသုံးရဘူး။

ဆရာကြီး ဦးသာနိုး၏ အင်္ဂလိပ်သဒ္ဒါ အောက်ခြေသိမ်း စာအုပ်မှ... ကူးယူဖော်ပြပါသည်။